Jæja jæja löngu kominn tími á nýtt innlegg. Sumarið er búið að vera alveg frábært, eins og ég hef sagt erum við búin að vera með fullt af fólki hjá okkur sem við getum nú varla kallað gesti en alveg frábært að fá þau. Við fórum í endann júní til Bornholm í sumarbústað í viku. Ég get ekki sagt annað en að það hafi verið frábært, húsið sem við vorum í var æði, veðrið var 25 stiga hiti og glampandi sól allann tímann og við nutum þess alveg í botn. Við skoðuðum eins mikið og við gátum, eyjan er rosalega falleg og hefur upp á svo margt að bjóða. Þannig að það er alveg nóg af efni í aðra ferð……
Síðan átti nú prinsessan á heimilinu afmæli 10.Júlí (til hamingju með það skottan mín) og það var haldið upp á það með tilheyrandi veitingum og góðu veðri. Rosalega fínn dagur og stelpan alveg hæstánægð með allt saman.
“Gestirnir” okkar eru nú allir farnir heim og við viljum þakka þeim fyrir frábært sumar, við hefðum ekki viljað gera þetta öðruvísi. Takk , takk fyrir okkur!!!!!

Nú er svona einhver hversdagsleiki að detta inn. Kiddi er byrjaður að vinna á fullu, á morgun förum við til Helsingør svo að hann geti skrifað undir nýja samninginn og þá er það allt klappað og klárt, og hann byrjar á nýja staðnum í ágúst. Óliver er byrjaður á nýju deildinni sinni og það gengur bara ágætlega, enn er mikið að starfsfólki í sumarfríi, og flest allir vinir hans eru einnig í fríi þannig að hann er stutta daga á leikskólanum og er komin heim upp úr 2 leytið. Jasmín er farin að hlakka til að byrja í 2.bekk (3.bekk á íslandi) og svo er hún líka að fara að byrja í tónlistarskólanum á kontrabassa, þannig að þetta verður spennandi vetur hjá henni.

Ég er búin að taka fullt fullt af myndum og nú þarf maður að fara að taka sig saman og koma þessu inn þannig að fleiri geti notið þeirra. Er ekki búin að ákveða hvort það verður Flickr eða Facebook en ég læt ykkur vita svo þið getir nú kíkt á þetta allt saman.

Kveðja í bili úr hitanum og góða veðrinu hér, fullt af sumri eftir hér hi hi hi………..

Jæja jæja nóg að gera hér á heimilinu. Í dag er síðasti dagurinn hjá Jasmín og Óliver í skóla og leikskóla, nú tekur við 4 vikna sumarfrí hjá Óliver og eitthvað aðeins lengra hjá Jasmín. Kiddi verður í 3 vikna fríi með þeim og svo tek ég við. Þau eru mikið búin að hlakka til þess að komast í frí og eru voða glöð með þetta. Á morgun kemur svo Steini til okkar og erum við ekkert smá spennt með það, það verður rosalega gaman að fá hann til okkar og hann verður hjá okkur í heilan mánuð Svo er auðvitað að koma fleiri gestir þar sem mamma og co koma á miðvikudaginn, og veðurspáin er aldeilis búin að breytast það á að hætta að rigna á mánudag þannig að vonandi fáum við gott veður. Annars er nú ekki hægt að kvarta , þó það komi skúrar þá fer hitinn ekki niður fyrir 18 gráður og það er voða milt og gott veður.

Ég verð að vinna vonandi á fullu í sumar, búið að panta þráðlaust internet þannig að nú er hægt að vinna á fullu á Bornholm líka hi hi hi.
Kiddi fór í eina viku í vinnu áður en að hann fer í sumarfrí, en svo eru breytingar hjá honum. Hann fór í viðtal um daginn hjá verslun í Helsingør og þau vilja gera allt til að fá hann. Þannig að nú er allt á fullu að hagræða hlutunum þannig að hann geti vonandi byrjað hjá þeim í ágúst. Duglegur kallinn…….

Við vorum nú ferlega ánægð með okkur um daginn, vorum á leikskólanum hjá Óliver og þá fór einn leikskólakennarinn að undrast á því að við værum að tala annað tungumál af og til. Kiddi útskýrði fyrir henni að við værum að tala íslensku því við kæmum frá Íslandi. Hún varð mjög undrandi og sagði að hún hefði haldið að við kæmum frá Jótlandi , við töluðum mjög góða dönsku en hún heyrði sterkan hreim en hélt að við værum bara ekki héðan frá Sjállandi. He he he danskan rokkar …………
Aldrei hélt ég nú samt að ég ætti eftir að segja þetta, þegar ég var yngri HATAÐI ég dönsku og Danmörk var síðasta landið sem ég ætlaði að heimsækja…. svona getur þetta verið skrýtið.

En jæja best að fara að eyða helginni í tiltekt og þrif fyrir komu gestanna , ekki getur maður látið mömmu sjá draslið hjá sér ????????

Við getum nú ekki sagt annað en að við séum búin að hafa það alveg rosalega fínt og notalegt. Veðrið er búið að vera alveg frábært og grillið notað óspart. Ég er búin að koma mér upp fínum kryddjurtum úti á verönd, basil, tómötum, dill, oregano og graslauk. Svo setti ég niður myntu í tilraunaskyni og hún dafnar jú svona rosalega vel að ég sé fram á að Mohito verði á morgunverðarborðinu næstu vikurnar………
Svo er ég með ólífutré fyrir utan hjá mér og í gær keypti ég lavenderblóm, og það er ekkert smá góð lykt af því, svona smá tilraun í að róa krakkana og kannski kallinn líka??

Kiddi er að klára önnina sína, síðustu 2 prófin verða í þarnæstu viku og svo tekur vinnan við fram að janúar. Það gengur rosalega vel hjá honum og hann er alveg hörkuduglegur, svo þarf að hann að safna saman fram að janúar sjónprufum hjá ákv. fjölda fólks innan 35 ára, þannig að nú er tíminn til að fara að koma sér í sjónpróf !!!!!

Krakkarnir blómstra alveg þegar sólin skín og það er erfitt að koma þeim inn á kvöldin. Þau eru auðvitað alveg farin að bíða eftir sumarfríi sérstaklega þar sem við fáum svo mikið að gestum og á eftir að verða örugglega alveg svakalega gaman hjá okkur. Óliver flytur á stærstu deildina í Júlí þar sem undirbúningur fer fram fyrir skólann. Danir mega reyndar alveg eiga það að þeir eru rosalega duglegir að meta krakka eftir aldri og getu ekki eftir einhverju fyrirfram ákveðnu skólaári. Við vitum alveg að það getur verið mikill munur á barni sem fætt er í janúar eða barni sem fætt er í desember, og þeir bjóða þessum börnum óspart að koma í skóla fyrr ef þeim finnst þau vera tilbúin. Sem mér finnst ekkert nema gott.

Ég er á fullu að vinna og ég get nú ekki sagt annað en að ég er mjög ánægð með að geta unnið svona heima. Það er búið að vera nóg að gera hjá mér og frábært að geta skellt sólhlífinni upp og tölvuna út og bara unnið. Hún Heiða sem ég vinn fyrir alveg frábær og stundum þarf ég aðeins að klípa í mig og átta mig á því hvað ég er heppin að hafa þetta.

En allir hressir og kátir og sólarkveðjur héðan úr Hørsholm

Jæja þá er Eurovision skollið á eina ferðina enn. Það að keppnin skuli nú vera 3 kvöld er nú ekki slæmt. ég hreint út sagt elska Eurovision og hef átt ófáar keppnirnar á vídeóspólum sem var horft á þangað til að spólan gat ekki meir. Ég verð nú að segja að ég sakna þess pínulítið þegar að hvert land söng á sínu tungumáli en það er nú farið að aukast aftur að lönd velji það að syngja á sínu máli.
Ég varð nú fyrir miklum vonbrigðum með Dani þegar að þeir sýndu ekki fyrst kvöldið sem var á þriðjudaginn, sýna greinilega bara það sem Danir keppa og þá er bara að vona að þeir komist áfram í úrslitin annars verð ég að sætta mig við sænskan þul eins og á þriðjudaginn. Eins líka þoli ég ekki hvað mikið af þessu er orðinn hreinn skrípaleikur, sum lögin voru hreint og beint rugl eins og til dæmis Írland, ég meina come on Írland hvað kom fyrir.

Eurovision er voða viðkvæmt fyrir mér og ég á mjög auðvelt með að líka vel við lög þó svo að ég hafi ekki hugmynd um hvað verið er að syngja um, eins og til dæmis sigurlagið í fyrra. En ég hlakka mikið til að sjá keppnina í kvöld og auðvitað vonar maður það besta fyrir Ísland, komi tími til að við komumst í úrslitin. En ég er tiltölulega ánægð með þetta nýja fyrirkomulag og held að það þaggi aðeins niður í þessum sem endalaust röfla um svindl og klíkuskap.

Áfram Eurovision

Jæja þá kom maður sér inn fyrir og skrifar svona hvað er búið að vera að bralla. Fyrst og fremst er veðrið búið að vera alveg frábært og maður notar hverja fría mínútu til að baða sig í sólinni. Svo er búið að vera nóg að gera hjá mér í vinnunni, ég er semsagt farin að vinna freelance og er búin að vera að vinna fyrir Össur á Íslandi og er með verkefni alveg fram á haust að minnsta kosti og sko ekkert smá ánægð með það, vonandi að þau halda bara að vera jafn ánægð með mig og þau hafa verið.

Svo eru tengdó að koma og kíkja á okkur um næstu helgi og ætla að vera í viku, það verður alveg frábært að hitta þau og fá að hafa þau hjá okkur. Svo eru náttúrulega allir farnir að hugsa til sumarsins og hlakka til að taka sér smá frí. Við ætlum í sumarbústað á Bornholm í endann á Júní og það verður voða gaman og mig er búið að langa að fara þangað alveg heillengi

Ég enda svo með veðurspánni fyrir næstu viku, gott að geta unnið heima og skroppið út í sólina svona þegar maður fær tíma. Mont mont he he he

Það kemur alltaf sá dagur á vorin , þegar ég labba út um dyrnar og finn tilfinninguna að ég eigi heima í útlöndum. Ég elska þessa tilfinningu, ég er örugglega minnsta vetrarmanneskja sem ég veit um , og það að koma út og það er hiti í loftinu og þú finnur fyrir vorinu, það er ekkert betra……..

Sem þýðir að nú er ég búin að þrífa grillið from top to bottom, bera viðarvörn á húsgögnin úti, er að fara að kaupa mér blómapotta til að setja niður kryddjurtir og tómata, búin að þrífa sessurnar og sópa alla veröndina. Alveg tilbúin fyrir vorið og sumarið!!!

Annars er allt gott að frétta af okkur, ég er búin að vera að vinna að 2 verkefnum síðan ég kláraði skólann, og er að klára síðuna fyrir Danica sem þau ætla að nota. Svo er auðvitað fyrirtækið okkar, stelpurnar rosa duglegar að vinna í því , við erum búnar að finna nafn og hönnunin á útliti síðunar og logoi er að fæðast. Samsagt allt í fínasta lagi. Er að fara núna og fá mér vks númer á kennitöluna mína svo ég geti nú farið að gefa út reikninga á þessa vinnu sem ég er búin að vera svo dugleg með…….

Veðrið er eins og áður sagði mjög fínt, vorið er að koma, sólin farin að skína og nú er búið að skrúfa niður í öllum ofnum og þeir ekki notaðir fyrr en næsta vetur.
Það er mjög mikið af vörum í búðum sem  maður kaupir bara á  sumrin bæði vegna þess að þær fást ekki eða þær eru svo dýrara að manni dettur ekki í hug að kaupa þær á því verði. Þannig að nú er maður farinn að kaupa jarðarber, hindber og ferskjur á fullu, bíðum eftir vatnsmelónunni og fetaosti í olíu (hafið þið prófað það saman mmmmmmmmm).

Vorkveðjur héðan úr Byporten

Jæja loksins læt ég heyra í mér. Loksins er verkefninu lokið og prófið búið. Titillinn er í höfn Lilja Björk Margmiðlunarhönnuður, ekki slæmt það og til hamingju ég.

Núna er ég bara aðeins að pústa og slappa af, fer svo á fullt í það að klára síðuna mína og finna mér vinnu.

Annars á ég nú eftir að sakna allra vinanna í skólanum , er búin að kynnast mikið af frábæru fólki en vonandi hittumst við sem flest aftur næsta janúar.

En ég lofa því að vera duglegri að láta í mér heyra

Við erum búin að vera hér á Íslandi núna í viku í frábæru yfirlæti. Allir hafa dekrað við mann og það er ekki hægt að kvarta yfir neinu. Ég verð nú samt að segja að sumt kom mér á óvart, húðin á mér er skrælnuð vegna kulda og rakaleysis, varirnar að springa vegna sömu ástæðu og svo eru öndunarfærin að aðlagast að vera ekki í sama raka. Hi hi hi ferlega skrýtið. Brá svolítið þegar ég fór í sturtu í 1.skipti , ég var alveg búin að gleyma prumpulyktinni af vatninu, var svona eins og þegar ég flutti fyrst til Reykjavíkur.

Áramótin voru frábær, við vorum í mat hér í Vallarásnum og svo seinna um kvöldið fórum við öll sömul í Álfabrekkuna til tengdó. Það var sprengt alveg rosalega og ég held að Tómas hennar Söndru hafi verið einna rosalegastur, alla vegana þá fóru kökurnar hver af annarri.

En nú fer að styttast í heimför, alveg magnað hvað maður á heima á mörgum stöðum, fórum heim til Íslands og svo erum við á leiðinni heim á föstudaginn líka. Er nú pínu farin að hlakka til að komast aftur heim í Hørsholm, aðallega vegna þess að ég sakna litlu systur og svo er veðrið hér búið að vera svakalegt. En hlakka til að komast heim og byrja  í skólanum næsta mánudag.

merrychristmas

Originally uploaded by lijondesign

Jæja þá er þetta allt saman að skella á og ýmislegt búið að ganga á hjá okkur. Við hjónakornin náðum okkur í magpest , hita og allt tilheyrandi í gær og erum búin að liggja eins og klessur bæði í gær og í dag. Við vorum búin að plana matarboð með hangikjöti, laufabrauði og öllu í dag , en við urðum að hætta við. Elín mín þú verður bara að fá hangikjötið 5.Janúar enda er nú nóg að halda upp á þá!!!!!!!
En annars er þetta allt að smella hjá okkur, og ætlum að byrja að skella í töskur í kvöld og njóta svo dagsins á morgun að gera ekki neitt, nema að borða góðan mat og vera með krökkunum.

Mig langar að óska ykkur öllum gleðilegra jóla og vona að þið hafið það sem allra allra best um hátíðirnar.

Jæks ég var að kíkja og sá að það var næstum því liðinn mánuður síðan að maður lét heyra í sér, það er náttúrulega engan veginn að ganga  og löngu orðið tímabært að láta heyra í sér.

Annars er búið að vera nóg að bralla hér, ég hef verið á fullu í lokaverkefninu í skólanum en síðan varð ég fyrir því skemmtilega óhappi að týna öllum gögnum um verkefnið úr tölvunni hjá mér. Auðvitað vorum við með aðra copy í annari tölvu en hún var svolítið gömul og heilmikil flash vinna tapaðist 2 vikum fyrir skil. Við töluðum við kennarana okkar og því frestast prófið okkar fram í mars og klárum við þá. Mest kómíkinn í þessu var að þetta tapaðist allt saman þegar ég var að gera backup af öllu saman!!!!!!!!!!!!

Auðvitað erum við búin að vera að undirbúa jólin eins og flestir, vorum mjög snemma í að kaupa jólagjafir og allt í góðum gír. Náðum að baka hálfmána, súkkulaðibitakökur og piparkökur. Ég ætlað að baka Sörur en þær verða að bíða til næstu jóla. Í dag fórum við í Julefest í leikskólanum hans Ólivers. Þar kom Jólasveinninn og það var dansað í kringum jólatréð, krakkarnir fengu nammipoka og fullorðna fólkið glögg og eplaskífur.

Á  fimmtudaginn síðasta fengum við þær leiðinlegu fréttir að afi hans Kidda hefði dáið um morguninn, sorgarfréttir en við hugsum þó til þess að hann Dengsi hefur það mjög gott þar sem hann er núna og gott fólk sem tók á móti honum. En vegna þessa þá höfum við ákveðið að koma til Íslands um áramótin til að vera viðstödd jarðaförina. Jólin verða því svolítið öðruvísi hjá okkur þar sem við fljúgum heim á Jóladag og komum svo aftur hingað líklega 3.Janúar.  Auðvitað er kominn mikill spenningur í fólkið að vera loksins að fara til Íslands eftir rúm 2 ár. Óliver hefur alltaf haldið því fram að Ísland sé Kastrup flugvöllur og þar eigi allir heima sem hann þekkir á Íslandi. Við fórum nú að útskýra þetta fyrir honum að við færum í flugvélina , flygjum yfir sjóinn og alla leið til Íslands. Hann tók þessu öllu vel, en eftir litla stund sagði hann að hann vildi ekki fara til Íslands því hann myndi örugglega pissa í sig í flugvélinni því þetta væri svo langt………………………

Ég er að vinna í að setja inn Desember myndir svona smá til að sýna brot af því sem við höfum verið að stússast, þannig að þær verða komnar inn fjótlega.

En best að halda áfram við að plana Íslandsferð og halda jól, við vonumst til að hitta sem flesta þegar við komum en stundum verðum við að minna okkur á að þetta er bara vika og maður getur ekki gert allt.